Hamingjan við völd í H verslun

H verslun hefur nú opnað dyr sínar í Austurgarði við Larsenstræti 2 á Selfossi. Opnuninni var formlega fagnað síðastliðið fimmtudagskvöld.

Verslunin er í eigu Ósa, móðurfélags Icepharma, og er sú þriðja sem opnuð er undir merkjum H verslunar – en tvær eru fyrir í Reykjavík, annars vegar almenn íþróttaverslun og hins vegar sérhæfð boltaverslun á Bíldshöfða. Hönnun verslunarinnar á Selfossi var í höndum Sólveigar Guðmundsdóttur.

Þuríður Hrund Hjartardóttir, framkvæmdastjóri Heilsu- og íþróttasviðs hjá Icepharma, segir opnunina marka mikilvægt og spennandi skref.

„Við höfum í nokkurn tíma leitað að hentugu rými fyrir H verslun á Selfossi og þegar þessi frábæra staðsetning bauðst, gripum við tækifærið. Sveitarfélagið og nágrenni þess eru meðal þeirra sem vaxa hvað hraðast á landinu og því afar áhugaverður markaður fyrir okkur. Þetta hefur verið einstaklega skemmtilegt verkefni og það hefur verið hreint stórkostlegt að fylgjast með þeim krafti og samhug sem starfsfólk, hönnuður og iðnaðarmenn hafa sýnt – allir hafa lagt sitt af mörkum og unnið sem ein heild að því að gera verslunina sem glæsilegasta,“ segir Þuríður.

Hér fyrir neðan eru myndir úr opnunarhófinu síðastliðið fimmtudagskvöld.