Hallur Símonarson hefur verið ráðinn forstöðumaður við Skóla- og velferðarþjónustu Árnesþings bs. Um er að ræða nýja stöðu en ráðningin er tímabundin til eins árs.
Hallur býr í Grímsnes- og Grafningshreppi. Hann er með BS í viðskiptafræði og hefur einnig verið við meistaranám í stjórnun og stefnumótun við Háskóla Íslands. Hallur hóf störf í dag, mánudaginn 20. apríl.
Hallur starfaði sem innri endurskoðandi hjá Reykjavíkurborg í mörg ár og hefur góða þekkingu á stjórnsýslu, rekstri, stjórnun og ráðgjöf.
Tekur að sér stjórnunartengd verkefni
Deildarstjórar á skóla- og velferðarsviði sinna áfram verkefnum sínum sem faglegir stjórnendur og starfsmenn á sviði skóla- og velferðarmála en Hallur tekur ýmis stjórnunartengd verkefni svo sem stefnumótun fyrir þjónustuna, verkefnastýringu, innleiðingu verkferla og skjalavistunar, daglegan rekstur, stjórnun, starfsmannamál og samskipti við stjórn svo eitthvað sé nefnt.