Fyrsti dagur og kvöldskemmtun Kótelettunnar á Selfossi gekk vel fyrir sig að sögn lögreglunnar á Suðurlandi. Mikil umferð var inn í bæinn allan daginn.
Eitthvað var um smá pústra á hátíðarsvæðinu í gærkvöldi og í nótt og einn gisti fangaklefa sökum ölvunar.
Lögreglan og gæsluliðar voru með mjög virkt eftirlit á svæðinu og haldlögðu töluvert af skilríkjum frá fólki sem var undir aldri. Áfram verður mjög virkt eftirlit á svæðinu öllu og mega gestir og gangandi eiga von á því að sjá lögreglumenn í akstri og gangandi um allt svæðið í dag.
Í tilkynningu frá lögreglunni á Suðurlandi segist lögreglan vona að allir Kótelettugestir, sem og aðrir, haldi áfram að skemmta sér vel og minnir um leið á að lögreglan er til staðar til að aðstoða.