Rekstrarafkoma Sveitarfélagsins Árborgar á árinu 2012 var jákvæð um 175,7 millj.kr. sem er 106,5 millj.kr. betri niðurstaða en áætlun gerði ráð fyrir.
Heildartekjur samstæðu eru 5.584 milljónir króna og heildarútgjöld 4.405 milljónir króna. Rekstrarhagnaður fyrir fjármagnsliði, afskriftir og skatta (EBITDA) er því 1.179 milljónir króna sem er 238 millj.kr. hærra en áætlun gerði ráð fyrir.
Fjármagnsgjöld vega þungt eða 614 milljónir króna nettó og afskriftir eru 364 milljónir og er rekstrarafkoma samstæðunnar því 200 milljónir króna fyrir skatta eða 131 milljónum hærri en áætlun gerði ráð fyrir. Tekjuskattur nemur 25 milljónum króna á árinu.
Skuldahlutfall skv. reglugerð 502/2012 var komið niður í 160,4% í lok árs 2012.
Í tilkynningu frá sveitarfélaginu segir að rekstur þess sé í traustum farvegi og hefur hann nú skilað hagnaði þrjú ár í röð þrátt fyrir erfiða tíð, háar skuldir og mikla verðbólgu. „Þetta hefur tekist með samstilltu átaki kjörinna fulltrúa, starfsmanna og íbúa sem hafa sýnt þessu erfiða verki einstaklega góðan skilning,“ segir í tilkynningunni.