Félag kvenna í atvinnulífinu mun heiðra þrjár konur á Viðurkenningarhátíð FKA þann 23. janúar næstkomandi. Þá kemur í ljós hvaða konur hljóta FKA viðurkenninguna, FKA þakkarviðurkenninguna og FKA hvatningarviðurkenninguna 2023.
FKA kallar eftir tilnefningum frá almenningi og atvinnulífinu sem dómnefnd mun meta og velja konur sem hljóta FKA þakkarviðurkenningu, FKA viðurkenningu og FKA hvatningarviðurkenningu.
Opnað hefur verið fyrir tilnefningar vegna Viðurkenningarhátíðar FKA 2023. Hægt er að tilnefna konur í öllum flokkum eða bara eina til og með 24. nóvember 2022.
Tilnefna HÉR á heimasíðu FKA.
Hvað eiga þær Guðbjörg í Marel, Edda Sif hjá Carbfix og Bryndís í Lindinni á Selfossi sameiginlegt?
Í tilkynningu frá FKA segir að það sé mikilvægt komandi kynslóðir að hafa fjölbreyttar fyrirmyndir til að máta sig við og konur sem hafa verið heiðraðar á Viðurkenningarhátíð FKA gegnum tíðina hafa verið sérstök hvatning og fyrirmyndir. Líkt og Guðbjörg Heiða, Edda Sif og Bryndís, svo dæmi séu tekin, sem eru konur sem hafa rutt brautir og sýnt athyglisvert frumkvæði og átt að baki eftirtektarvert ævistarf. Í gegnum tíðina hefur fjölbreyttur hópur kvenna verið tilnefndur og heiðraður og þá má segja að það sem sameinar þær allar er að einhver þarna úti varði sinni dýrmætustu auðlind, tímanum sínum í að senda inn tilnefningar. Öll eru því hvött til að tilnefna þannig að ólíkar konur af landinu öllu komist á blað en allar eiga þær erindi.