Hafdís gefur kost á sér í 3. sæti

Hafdís Hrönn Hafsteinsdóttir. Ljósmynd/Aðsend

Hafdís Hrönn Hafsteinsdóttir, lögfræðingur, hefur ákveðið að gefa kost á sér í þriðja sæti á lista Framsóknar í Suðurkjördæmi, í prófkjöri flokksins fyrir komandi Alþingiskosningar.

Í tilkynningu frá Hafdísi segir að hún hafi tekið þessa ákvörðun eftir mikla hvatningu og að vel ígrunduðu máli.

Hafdís býr á Selfossi ásamt eiginmanni sínum og tveimur dætrum. Hún starfar sem lögfræðingur og er stjórnarformaður Félags Sameinuðu þjóðanna á Íslandi. Einnig hefur hún lagt sitt af mörkum fyrir Kvennaráðgjöfina, þar sem hún hefur sinnt lögfræðiráðgjöf og situr í umboði hennar í verkefnastjórn Sigurhæða – þjónustumiðstöðvar fyrir þolendur ofbeldis á Suðurlandi.

„Undanfarin ár hef ég lagt mitt af mörkum fyrir Framsókn í Árborg þar sem ég hef kynnst mikið af öflugu fólki sem lætur sig samfélagið varða. Ég er stolt af því að vera kona í Framsókn og er stolt af því flotta starfi sem flokkurinn hefur verið skilað af sér. Allt gott má bæta og vil ég leggja mitt af mörkum og styðja við áframhaldandi framsókn á komandi kjörtímabili,“ segir Hafdís.

„Málefnin eru mörg og fjölbreytt en það sem ég tel vera mest aðkallandi fyrir okkur í Suðurkjördæmi núna er að við blásum til sóknar í atvinnumálum,“ segir Hafdís en hægt er að kynna sér áherslur hennar á www.hafdishronn.is.