Formenn björgunarsveitanna í Uppsveitum Árnessýslu hafa miklar áhyggjur af því að fyrirhuguð gjaldtaka við Gullfoss geti beint fleiri ferðamönnum að austurbakka Hvítár, þar sem öryggisinnviðir eru ekki til staðar.
Við Gullfoss hefur verið byggð upp aðstaða vestan Hvítár með öryggi og stýringu á umferð gesta í forgrunni. Austan árinnar er land í einkaeigu og aðstaða til að taka á móti miklum fjölda ferðamanna er ekki fyrir hendi.
„Öryggi ferðamanna verður að vera tryggt áður en breytingar sem geta haft áhrif á hegðun ferðamanna eru settar í framkvæmd. Á austurbakka Hvítár vantar meðal annars örugga göngustíga, öryggisvarnir við gljúfurbrúnir og önnur hættusvæði, merkingar og leiðbeiningar fyrir gesti. Einnig þarf að kanna hvort vegir, aðgengi og fjarskipti tryggi að hægt sé að koma fólki til aðstoðar ef slys verður. Án öruggra fjarskipta getur verið erfitt að kalla eftir hjálp og samhæfa viðbrögð,“ segja formenn björgunarsveitanna í fréttatilkynningu.
Formennirnir telja að fáeinar færslur áhrifavalda eða ákvörðun ferðaskipuleggjenda geti aukið umferð um austurbakkann á skömmum tíma.
„Þegar gestum fjölgar skyndilega á óundirbúnu svæði getur skapast alvarleg hætta áður en hægt er að bregðast við. Við viljum koma í veg fyrir að fólk slasist eða lendi í lífshættu.“
Björgunarsveitirnar kalla eftir því að stjórnvöld fresti fyrirhugaðri gjaldtöku þar til búið er að meta öryggisáhrif svæðisins sem og tryggja framkvæmd áður en aukinn fjöldi ferðamanna sækir svæðið heim.
Undir fréttatilkynninguna skrifa formenn björgunarsveitanna, þeir Tobias Ölvissson, Björgunarfélaginu Eyvindi, Kristinn Bjarnason, Björgunarsveit Biskupstungna, Magnús Bjarki Snæbjörnsson, Björgunarsveitinni Ingunni, Jóhannes Þórólfur Guðmundsson, Hjálparsveitinni Tintron og Björn Axel Guðbjörnsson, Björgunarsveitinni Sigurgeir.