Hafa áhyggjur af málefnum Heilsustofnunar

Bæjarstjórn Hveragerðis lýsir yfir þungum áhyggjum af þeim erfiðleikum sem stjórnendur Heilsustofnunar NLFÍ glíma nú við.

“Stofnunin hefur veitt þúsundum einstaklinga endurhæfingu og meðferð í áratugi og fjölmargir eiga þeirri meðferð það að þakka að þeir geta verið fullgildir þátttakendur í samfélaginu. Sífelld óvissa um framtíð rekstrarins er ekki boðleg þegar um jafn mikilvægan rekstur er að ræða og hér er.

Nýjustu fréttir um yfirvofandi uppsagnir reyndustu starfsmanna stofnunarinnar valda ugg varðandi framtíðina. Bæjarstjórn hvetur Velferðarráðuneytið og samninganefnd Sjúkratrygginga Íslands til að bregðast við og hefja nú þegar viðræður við stjórnendur HNLFÍ um gerð nýs þjónustusamings til lengri tíma,” segir í bókun sem samþykkt var á bæjarstjórnarfundi í vikunni.