Sveitarstjórn Bláskógabyggðar hefur áhyggjur af áformum um breytt fyrirkomulag lyfjaafgreiðslu í Laugarási.
Málið var rætt á fundi sveitarstjórnar í gær en fyrir liggur að Lyfja ehf hyggst breyta lyfjaafgreiðslu í Laugarási og leitar nú eftir samningi við Heilbrigðisstofnun Suðurlands um að lyfjaafgreiðsla færist inn á heilsugæsluna og í hendur starfsfólks þar.
Í ályktun sveitarstjórnar segir að hætt sé við að þjónusta við notendur heilsugæslunnar verði skert, til dæmis hvað það varðar að fá lyfseðilsskyld lyf afgreidd í beinu framhaldi af læknisheimsókn. Sveitarstjórn hvetur þjónustuaðila til þess til þess að lyfjaafgreiðsla verði með óbreyttu sniði í Laugarási.