Síðastliðinn föstudag voru skólaslit Bláskógaskóla á Laugarvatni haldin með hátíðlegum hætti. Við athöfnina var Sveinbjörn F. Einarsson frá Heiðarbæ í Þingvallasveit heiðraður sérstaklega fyrir 45 ára ómetanlegt framlag sitt sem skólabílstjóri, en hann lætur nú af störfum.
Á sínum tíma óskaði Sveinbjörn eftir því að taka að sér skólaaksturinn. Þar réð meðal annars eigin reynsla hans miklu, en hann hafði sjálfur þurft að vera á heimavist til að sækja skóla. Honum var því mikið í mun að börnin í sveitinni gætu búið heima hjá fjölskyldum sínum og sótt skóla þaðan.
Þegar Sveinbjörn hóf aksturinn var vetrarþjónusta ekki sú sama og hún er í dag og margir töldu erfitt að halda úti reglulegum skólaakstri við þær aðstæður. Hann lét það þó ekki aftra sér og hefur alla tíð síðan haft yfir að ráða bílum og búnaði til að sinna verkefninu, óháð veðri og færð.
Samhliða skólaakstrinum hefur Sveinbjörn sinnt búskap sínum af sama dugnaði. Á milli ferða fór hann heim til að sinna störfum á búinu og mætti svo aftur til að tryggja að börnin kæmust örugg til og frá skóla.
Í gegnum árin hefur hann sinnt skólaakstrinum af öryggi, festu og umhyggju. Fyrir fjölmörg börn og fjölskyldur hefur hann verið fastur og traustur punktur í daglegu lífi og órjúfanlegur hluti af skólasamfélaginu í Þingvallasveit. Þótt barnahóparnir hafi oft ekki verið stórir fylgdi hann mörgum nemendum alla þeirra skólagöngu, allt frá fyrstu árum grunnskólans og fram að útskrift. Þannig mynduðust tengsl sem spönnuðu heilan áratug í lífi margra barna.
Við skólaslitin voru Sveinbirni færðar innilegar þakkir fyrir ómetanlegt framlag sitt til skólasamfélagsins og afhent viðurkenning, gjöf og blómvöndur í þakklætisskyni.
Sveinbjörn tók einnig til máls við athöfnina og þakkaði fyrir það traust sem honum hefur verið sýnt í gegnum árin. Hann sagði að góð samskipti við börnin og fjölskyldur þeirra hefðu skipt miklu máli. Hann rifjaði jafnframt upp þann góða starfsanda sem ríkt hefur innan skólans og nefndi sérstaklega morgunstundirnar á kaffistofunni þar sem skólabílstjórar og starfsfólk hittast yfir kaffibolla áður en dagurinn hefst.
Bláskógaskóli þakkar Sveinbirni innilega fyrir farsæla samfylgd og ómetanlegt framlag til skólasamfélagsins í Þingvallasveit í 45 ár.