Undanfarna daga hefur lögreglan á Suðurlandi fengið tilkynningar um sprengingar á Selfossi. Í tilkynningu frá lögreglunni segir að leifar af sprengibúnaði beri þess merki að um heimatilbúnar sprengjur er að ræða.
Þar er meðal annars notast við ætandi efni ásamt öðrum efnum til að búa til sprengjurnar og er efnunum blandað saman í lokuð plastílát, svo sem gosflöskur og við efnahvörf sem verða, myndast mikið magn af gasi sem veldur sprengingu.
Í tilkynningu lögreglu segir að þessi efni og gasið sem myndast séu hættuleg fyrir þann sem útbýr sprengjuna og þá sem eru í nágrenni við búnaðinn þegar sprengingin verður. Þá eru þekkt dæmi um að kraftur af samskonar sprengjum getur og hefur laskað hendur einstaklinga ef þær springa í höndum þeirra. Þá þarf heldur ekki að fjölyrða um skaðsemi þess að ætandi efni lendi á húð og jafnvel í andlit og augu viðkomandi.
Lögreglan biður foreldra um að fylgjast með hvort börn þeirra séu að meðhöndla slík efni og ræði við þau um mögulega skaðsemi heimatilbúinna sprengja. Þá óskar lögreglan eftir upplýsingum frá almenningi um sprengingarnar eða háværa hvelli sem kunna að hafa heyrst síðastliðna daga.
Hægt er að hafa samband við lögregluna á Suðurlandi í síma 444-2000 á dagvinnutíma eða með því að senda tölvupóst á netfangið sudurland@logreglan.is.
Ef fólk telur sig finna órofnar plastflöskur sem bera þess merki um að í þeim sé torkennileg efni skal ekki hreyfa við þeim og hafa beint samband við 1-1-2 og tilkynna um slíkt til lögreglu.