Staðfest hefur verið að fuglaflensuveirur (H5) greindust í sýnum sem tekin voru úr heimilishænum sem aflífaðar voru á Reykjum á Skeiðum á föstudaginn langa.
Hænurnar voru með sjúkdómseinkenni sem bentu sterklega til að um fuglaflensu væri að ræða. Auk þess hafði fuglaflensa greinst í hrafni sem fannst dauður á bænum nokkrum dögum áður.
Sýnin voru rannsökuð á Tilraunastöð HÍ að Keldum en verða rannsökuð nánar á rannsóknarstofu erlendis, meðal annars hvað meinvirkni varðar og er niðurstöðu að vænta í næstu viku.
Í tilkynningu frá Matvælastofnun segir að talið sé nokkuð víst að hænurnar hafi smitast af villtum fuglum. Litlar líkur eru taldar á að smit hafi borist frá hænunum í aðra alifugla en Matvælastofnun mun kanna það nánar og segir mikilvægt að eigendur alifugla á svæðinu fylgist vel með fuglunum sínum og tilkynni án tafar til Matvælastofnunar ef þeir verða varir við sjúkdómseinkenni eða dauða.
Fólki bent á að gæta ítrustu sóttvarna
Hætt er við að töluvert sé um fuglaflensusmit í villtum fuglum um þessar mundir. Eins og fram kom í frétt sunnlenska.is á föstudag hefur fuglaflensa þegar greinst í hrafni á Skeiðum, súlu í Selvogi og heiðagæs í Hornafirði. Á undanförnum dögum hefur Matvælastofnun borist mikið af tilkynningum um dauða villta fugla víða á landinu. Stofnunin fer yfir allar ábendingar og metur hvort ástæða sé til að taka sýni. Matið byggir m.a. á staðsetningu, fuglategund og tíma frá því fuglinn fannst.
Fólki er bent á að gæta ítrustu sóttvarna ef það þarf að handleika villta fugla, hvort sem þeir eru dauðir eða lifandi. Hræ skulu annað hvort látin liggja óhreyfð eða tekin í plastpoka án þess að þau séu snert með berum höndum.
Engin dæmi eru um að fólk smitist af fuglaflensu við neyslu eggja eða fuglakjöts, hvort sem er af alifuglum eða villtum fuglum.