Veðurstofa Íslands hefur hækkað viðvörunarstig á veðurviðvörunum á Suðausturlandi og á Vestfjörðum og er nú appelsínugul hríðarviðvörun í gildi vegna illviðrisins sem mun ganga yfir landið á morgun.
Á Suðausturlandi er gul viðvörun í gildi frá klukkan 8 til 11 en þá tekur við appelsínugul viðvörun sem gildir til klukkan 16.
Austan stormur, 20-28 m/sek, verður vestan Öræfajökuls með talsverðri snjókomu eða slyddu og skafrenning með slæmu skyggni og versnandi færð. Ekkert ferðaveður verður á svæðinu og einnig er hætta á foktjóni og er fólk er hvatt til að tryggja lausamuni.
Þjóðvegur 1 verður lokað, á milli Hvolsvallar og Hafnar, klukkan 6 í fyrramálið.
Viðvörunarstig hefur einnig breyst á Suðurlandi, appelsínugul viðvörun gildir sem áður á milli 7 og 13 en á undan henni, milli 5 og 7 er nú gul viðvörun í gildi.
Veðurstofan fylgist náið með þróun veðursins og viðvaranir uppfærðar ef ástæða þykir til.