Rennsli við Eldvatn í Skaftá hefur aukist jafnt og þétt frá því í gærkvöldi og á tíunda tímanum í morgun mældist það rúmlega 520 m3/sek.
Vatnshæðarmælir við Sveinstind sýnir nú um 1.400 m3/sek þegar tekið er tillit til þess að talsvert af hlaupvatni er farið að flæða framhjá mælinum líkt og í fyrri hlaupum. Mikið hefur hægt á vextinum frá því kl. 23 í gær. Þróun hlaupsins í nótt bendir til þess að hámarksrennsli hlaupsins nú verði minna en bæði 2015 og 2018. Hámarksrennsli hlaupsins 2018 var rúmir 2.000 m3/sek.
Svipuð áhrif og 2018
Áfram er reiknað með að hlaupið komi til með að ná hámarki við þjóðveg 1 á morgun. Gera má ráð fyrir því að útbreiðsla hlaupsins komi til með að vaxa í byggð í sólarhring eða meira, eftir að hámarksrennsli er náð við Eldvatn.
Íssjármælingar Jarðvísindastofnunar gefa til kynna að vatnsmagn hlaupsins úr eystri katlinum verði meira en 2018, því geta áhrif hlaupsins í byggð orðið svipuð og 2018, þrátt fyrir að hámarksrennsli nú verði mögulega minna. Við þetta bætist að hlaupið úr vestari katlinum og úrkoma að undanförnu gerir það að verkum að flóðasvæðið er mettað af vatni sem mun líklega auka útbreiðslu hlaupsins.
Óx hraðar en áður hefur sést
Hlaupið óx nokkuð hratt í fyrstu og var vöxturinn við Sveinstind fyrstu 12 tímana mun hraðari en áður hefur sést. Þessi hraði vöxtur í gær gaf tilefni til þess að hafa áhyggjur af því hversu stórt hlaupið yrði. Líklegasta skýringin á hröðum vexti er sú að hlaupið úr eystri katlinum kemur í kjölfar hlaups úr þeim vestari. Vatnið á því greiðari leið undir jöklinum. Við þetta bætist að hlaupið ýtir vatni sem fyrir er í farveginum úr vestari katlinum á undan sér.
Við Sveinstind í gærkvöldi. Ljósmynd/Einar Sindri Ólafsson