Undanfarna sólarhringa hefur rafleiðni í Múlakvísl aukist jafnt og þétt á ný og mælist hún nú um 240 µS/cm.
Leiðnimælingar gefa vísbendingar um magn jarðhitavatns í ám og bendir hækkuð leiðni til þess að lítið jökulhlaup sé í gangi. Enn sem komið er hefur vatnshæð í ánni ekki hækkað samhliða aukinni leiðni, en ekki er útilokað að hún geti hækkað á næstu dögum.
Þetta kemur fram í tilkynningu frá Veðurstofunni og þar er því bætt við að gasmengun mælist á svæðinu og eru ferðamenn hvattir til að sýna aðgát. Þeir sem verða varir við einkenni sem gætu bent til gasmengunar, eins og sviða í augum eða koki, eru hvattir til að yfirgefa svæðið.
Þann 18. ágúst síðastliðinn hófst jökulhlaup í Múlakvísl sem stóð yfir í nokkra daga. Samhliða hlaupinu mældist töluverð gasmengun og há rafleiðni, sem náði yfir 500 µS/cm þann 19. ágúst.