Hættustigi lýst yfir á Suðurlandi

Eftir stöðufund aðgerðarstjórnar Almannavarna í umdæmi Lögreglustjórans á Suðurlandi, sem haldinn var í stjórnstöð a Hellu, var ákveðið að leggja til við Ríkislögreglustjóra að færa aðgerðir vegna yfirstandandi óveðurs af óvissustigi á hættustig.

Óveður það sem spáð var er nú að ganga inn á landið og orðið mjög hvasst syðst í umdæminu.

Þannig mældist 28 m/sek meðalvindur á Vatnsskarðshólum kl. 16:00 og meðsta vindhviða þar 43 m/sek. Á sama tíma mældist 25 m/sek meðalvindur við bæinn Steina undir Eyjafjöllum og á Fagurhólsmýri mældist 30 m/sek meðalvindur kl. 17:00.

Sem fyrr er fólk hvatt til að vera ekki á ferð að nauðsynjalausu.

Skilgreining á hættustigi: Ef hættumat leiðir í ljós að hætta fer vaxandi verður að grípa til tafarlausra ráðstafana til að tryggja sem best öryggi þeirra sem á svæðinu búa/dvelja. Slíkt er gert með því að efla viðbúnað neyðar- og öryggisþjónustunnar á viðkomandi svæði, ásamt því að grípa til fyrirbyggjandi aðgerða s.s. rýmingar, brottflutnings eða lokunar svæða. Einnig eru leiðbeiningar og viðvaranir einkennandi fyrir þetta stig.