Hæstiréttur staðfesti ákvörðun sýslumanns

Hæstiréttur hefur staðfest ákvörðun sýslumannsins á Selfossi um að svipta ökumann mótorhjóls ökuréttindum til bráðabirgða eftir að hann var mældur á 182 km hraða í Ölfusinu þann 2. maí sl.

Lögreglan mætti hjólinu á Suðurlandsvegi rétt við Kotstrandarkirkju.

Ökumaðurinn neitaði sök og kærði niðurstöðu sýslumanns til Héraðsdóms Suðurlands, sem felldi sviptinguna úr gildi. Taldi dómurinn að ökumaðurinn hefði fært nokkur rök fyrir kröfunni.

Hæstiréttur taldi hins vegar öll skilyrði fyrir hendi til að svipta ökumanninn ökuréttindum og staðfesti ákvörðun sýslumanns.