Veðurstofan hefur gefið út gula viðvörun fyrir Suðurland og Suðausturland vegna hvassviðris á morgun, sunnudag.
Á Suðurlandi gildir viðvörunin frá klukkan 14 til 21. Gert er ráð fyrir suðvestan 15-23 m/sek og vindhviðum yfir 30 m/sek við fjöll.
Vindstrengir undir fjöllum geta verið varasamir fyrir ökutæki, sér í lagi þau sem eru viðkvæm fyrir vindi. Lausamunir geta fokið og búast má við talsverðri rigningu.
Á Suðausturlandi gildir viðvörunin frá klukkan 15 til 23 og þar verður hvassast í Öræfum.