Veðurstofan hefur gefið út gula viðvörun fyrir Suðurland sem tekur gildi klukkan 2 í nótt og gildir til klukkan 9 í fyrramálið.
Gert er ráð fyrir hríðarveðri, hvassviðri eða stormi með vindhraða á bilinu 13-20 m/sek og mjög hvössum vindstrengjum við fjöll sem staðbundið geta farið yfir 30 m/sek.
Búast má við talsverðri eða mikilli snjókomu eða éljagangi með skafrenningi og takmörkuðu eða lélegu skyggni og versnandi akstursskilyrðum, einkum á Hellisheiði og í Þrengslum.
Afmarkaðar samgöngutruflanir og lokanir á vegum eru líklegar og er fólki bent á að sýna varkárni og fylgjast með veðurspám.