Veðurstofan hefur gefið út gula viðvörun fyrir Suðurland sem gildir frá klukkan 23 í kvöld til klukkan 6 á nýársdagsmorgun.
Það mun blása að vestan, 10-18 m/sek, og ganga á með dimmum og hvössum éljum og skafrenningi. Vaxandi vindur og aukin ofankoma verður á gamlárskvöld og nýársnótt
Vegagerðin telur líklegt að færðin geti spillst aðfaranótt nýársdags og samgöngutruflanir verði fram eftir degi á nýársdag. Óvissustig verður á Hellisheiði í nótt milli klukkan 2 og 4.