Veðurstofan hefur gefið út gula viðvörun fyrir Suðurland sem gildir frá klukkan 14 á þriðjudag til klukkan 2 aðfaranótt miðvikudags.
Gert er ráð fyrir suðvestan hvassviðri, 15-20 m/sek. Búast má við talsverðum éljagangi með skafrenningi og takmörkuðu eða lélegu skyggni og versnandi akstursskilyrðum, einkum inntil landsins og til fjalla.
Í tilkynningu frá Veðurstofunni segir að afmarkaðar samgöngutruflanir séu líklegar, einkum á Hellisheiði. Fólki er bent á að sýna varkárni og fylgjast með veðurspám.