Veðurstofan hefur gefið út gula viðvörun sem gildir fyrir Suðurland frá klukkan 10 á sunnudagsmorgun, til klukkan 21 á sunnudagskvöld, vegna óveðurs sem gengur yfir landið.
Gert er ráð fyrir norðvestan 18-23 m/sek undir Eyjafjöllum og vindhviðum yfir 30 m/sek. Varasamt verður að vera á ferðinni á ökutækjum sem taka á sig mikinn vind og er fólk hvatt til að ganga frá lausamunum.
Appelsínugul viðvörun gildir á suðausturlandi frá klukkan 6 á sunnudagsmorgun, til klukkan 3 aðfaranótt mánudags. Þar verður norðvestan 20-28 m/sek með vindhviðum staðbundið yfir 40 m/sek og ekkert ferðaveður á svæðinu.
Ríkislögreglustjóri hefur, í samráði við lögreglustjórann á Suðurlandi, lýt yfir hættustigi á Suðurlandi vegna veðurspárinnar.
UPPFÆRT KL 18:08: Samkvæmt upplýsingum frá lögreglunni á Suðurlandi má búast við veglokunum frá Kirkjubæjarklaustri og austur um, frá því snemma í fyrramálið allt þar til veðrinu slotar. Veðurfræðingar hafa varað við því að í verstu útkomu gæti komið til þess að færa þurfi viðbúnaðarstigið á rautt fyrir Suðausturland um tíma á morgun. Fólk er hvatt til að fylgjast vel með veðurspám og ferðaþjónustuaðilar eru beðnir um að upplýsa ferðamenn um veðurspár. Aðgerðastjórn verður mönnuð á skrifstofu lögreglustjóra ef farið verður yfir á rautt í umdæminu.