Veðurstofan hefur gefið út gula viðvörun fyrir Suðurland og Suðausturland sem gildir frá fimmtudagsmorgni og fram yfir hádegi.
Á Suðurlandi verður austan stormur og gildir viðvörunin á milli klukkan 7 og 13. Gert er ráð fyrir austan 18-25 m/sek og staðbundnum vindhviðum yfir 35 m/sek, t.d. undir Eyjafjöllum og í Vestmannaeyjum. Ferðaveður er varasamt og fólk er hvatt til að huga að lausamunum.
Á Suðausturlandi verður austan stormur og talsverð rigning en viðvörunin gildir á milli klukkan 7 og 15. Þar er búist við austan 20-28 m/sek með mjög snörpum vindhviðum. Einnig má búast við talsverðri rigningu með tilheyrandi vatnavöxtum. Ekkert ferðaveður verður á svæðinu.