Selfossveitur eru þessa dagana að vinna við borholuna SE-45 við Selfossveg á bökkum Ölfusár. Verið er að athuga stöðuna á holunni því við prófanir hefur holan ekki skilað þeim afköstum sem ætlast var til.
Holan, sem er 978 metra djúp er fóðruð með stálrörum niður á 349 metra. Samkvæmt upplýsingum frá Selfossveitum leikur grunur á að hrun hafi orðið fyrir neðan fóðringuna, sem hindrar vatnsflæði.
Til að kanna þetta þarf að láta myndavél síga niður í holuna en fyrst þarf að hífa upp búnaðinn sem er í holunni, dælu og rör henni tengd.
Með þessu eru vonir bundnar við að auka framleiðslugetu holunnar umtalsvert eða í samræmi við þær væntingar sem prufudælingar gáfu til kynna.
