Grunnskólanemar rannsaka gróðurmyndun

Í þessari viku unnu nemendur 5. bekkjar Hvolsskóla við nýtt tilraunaverkefni sem nefnist Vistheimt og er í samvinnu við Landgræðslu ríkisins og Landvernd.

Grunnskólinn Hellu og Þjórsárskóli taka einnig þátt í verkefninu, hvor á sínum heimaslóðum.

Vistheimt er skilgreint sem það ferli að aðstoða við endurheimt vistkerfis sem hefur hnignað, skemmst eða verið eyðilagt. Verkefnið felst í því að gera tilraunir með mismunandi aðferðir við uppgræðslu örfoka lands og sem dæmi mætti nefna sáningu mismunandi frætegunda, heyþakningu og áburðargjöf.

Hvolsskóli fékk sandspildu úr landi Berjaness í Landeyjum til þess að gera tilraunirnar á. Gerðir voru 50 tilraunareitir og þeir meðhöndlaðir vísindalega. Í haust munu krakkarnir fara aftur á staðinn og gera mælingar og talningar og vinna úr gögnum og skrá. Síðan munu þau fara hvert haust það sem eftir er skólagöngu og fylgjast með framvindu gróðurmyndunar á sínum reitum.

Næsta vor mun svo næsti 5. bekkur fara og útbúa sína reiti og síðan koll af kolli. Reiknað er með að verkefnið standi a.m.k. í tíu ár.