Dómsmálaráðherra hefur skipað Grím Hergeirsson í embætti lögreglustjóra á Suðurlandi frá 1. apríl næstkomandi.
Grímur hefur verið settur lögreglustjóri á Suðurlandi síðan 1. júlí í fyrra en jafnframt því hefur hann gegnt starfi sínu sem lögreglustjórinn í Vestmannaeyjum. Staða lögreglustjórans í Vestmannaeyjum hefur nú verið auglýst og skipað verður í þá stöðu frá og með 1. apríl næstkomandi.
Grímur hóf störf hjá lögreglunni í Reykjavík 1996 og var hjá lögreglunni á Selfossi 1997-2000. Síðan starfaði hann sem kennari við Lögregluskóla ríkisins, rannsóknarlögreglumaður og síðar varðstjóri á Selfossi, verkefnastjóri hjá Sveitarfélaginu Árborg, lögmaður í samstarfi við aðra og síðan löglærður fulltrúi hjá sýslumanninum á Selfossi.
Árið 2015 færði hann sig til lögreglustjórans á Suðurlandi og var fyrst rannsóknarlögreglumaður, síðar löglærður fulltrúi ákærusviðs, en frá 2017 staðgengill lögreglustjóra og yfirmaður ákærusviðs embættisins.
Grímur var settur lögreglustjóri á árinu 2020, fyrst á Suðurlandi og síðan á Suðurnesjum en frá nóvember 2020 hefur hann verið skipaður lögreglustjóri í Vestmannaeyjum og frá júlí á síðasta ári verið settur lögreglustjóri á Suðurlandi.