Gríðarlegt landrof hefur orðið í Reynisfjöru í Mýrdal síðustu daga og í síðustu viku hrundi stór bakki úr hlíðum Reynisfjalls niður að viðvörunarskiltunum við fjöruna.
Austlægar áttir hafa verið ríkjandi á svæðinu í margar vikur þannig að mikill sandur flyst í vesturátt úr fjörunni og hefur gjörbreytt landslaginu.
Elstu menn í Mýrdalnum hafa ekki séð annað eins landrof í Reynisfjöru en telja þó líklegt að sandfjaran muni myndast aftur með tíð og tíma í vestlægum vindáttum.
Eins og sjá má á myndunum hér fyrir neðan er allt annað landslag í Reynisfjöru þessa dagana heldur en fólk á að venjast.
