Skeiða- og Hrunamannavegi verður lokað við Stóru-Laxá á hádegi á morgun, fimmtudag, vegna yfirvofandi vatnavaxta um helgina. Vegurinn verður grafinn í sundur við Stóru-Laxá til þess að verja nýja brúarmannvirkið sem þar er í smíðum.
„Brúaropið í dag er svo lítið vegna framkvæmdanna við nýju brúna og það yrði mikið tjón ef undirsláttur hreyfðist til,“ sagði Svanur Bjarnason, svæðisstjóri Vegagerðarinnar á suðursvæði, í samtali við sunnlenska.is.
„Vegurinn verður bara grafinn í sundur við brúarenda núverandi brúar og veitt framhjá,“ segir Svanur.
Búist er við að lokunin vari í nokkra daga og er ökumönnum beint um hjáleiðir í uppsveitunum.
Stefnt er að því að hefja steypuvinnu við brúargólfið á nýju brúnni á morgun fimmtudag og hefur verið byggður skáli yfir brúnna sem verður upphitaður í 10°C. Steypuvinnan verður gerð í einu lagi á 36 klukkustundum en um 130 fullhlaðnir steypubílar fara í verkið.
