Síðastliðinn fimmtudag skrifuðu fulltrúar Heilbrigðisstofnunar Suðurlands og Hveragerðisbæjar undir samning við Ás hjúkrunarheimili um samþætta heimaþjónustu við íbúa í Hveragerði.
Samningurinn tekur gildi í dag en verkefnið er tilraunaverkefni sem að byggist á aðgerðaráætlun Gott að eldast, sem að er samstarfsverkefni milli félags- og húsnæðismálaráðuneytis og heilbrigðisráðuneytis. Ás mun þannig sinna heimahjúkrun og félagslegum heimastuðningi við íbúa Hveragerðisbæjar 60 ára og eldri sem sækja um og fá samþykkta slíka þjónustu. Áður hefur í Ási verið starfrækt dagdvöl ásamt því að þaðan hafa íbúar Hveragerðisbæjar sem óskað hafa eftir fengið mat sendan heim.
„Ég tel mikilvægt og gott skref stigið í dag í átt að því að tryggja samfellu milli þjónustustiga fyrir þá íbúa Hveragerðisbæjar sem að þurfa stuðning með það að markmiði að geta haldið áfram að búa á eigin heimili. Með þessum samningi bind ég vonir við að hægt verði að þróa þjónustuna og betur mæta þeim fjölbreytta hópi sem að nú þiggur þjónustu,“ sagði Karl Óttar Einarsson, forstjóri Grundarheimilanna, þegar samningurinn var undirritaður.
Betri lífsgæði fyrir íbúana
Díana Óskarsdóttir, forstjóri Heilbrigðisstofnunar Suðurlands, segir að með þessum samningi sé verið að sameina krafta heilbrigðis- og félagsþjónustu með það að markmiði að tryggja að íbúar fái þjónustu á réttum tíma og af réttum aðilum.
„Þetta er mikilvægt skref í átt að heildstæðri og einstaklingsmiðaðri þjónustu sem tekur mið af þörfum hvers og eins. Ég tel þetta vera sterkt dæmi um hvernig samvinna getur skapað betri lífsgæði fyrir íbúa okkar. Því í grunninn viljum við öll það sama sem er að geta notið efri áranna sem best með öryggi, reisn og góðum stuðningi,“ segir Díana.
Pétur G. Markan, bæjarstjóri Hveragerðisbæjar, tekur undir þetta og segir að öflug og metnaðarfull öldrunarþjónusta í fjölbreyttum myndum sé eitt af einkennum Hveragerðisbæjar, og Hvergerðingar séu stoltir af því.
„Með þessum samningum undir verkefninu Gott að eldast erum við að taka mikilvægt framfaraskref í þjónustu, frelsi og valdeflingu fyrir íbúa 60+. Með verkefninu Gott að eldast eflum enn frekar lífsgæði og velferð íbúa bæjarins – það er mikið fagnaðarefni og takt við þær áherslur sem nú móta bæinn,“ segir Pétur.