Gosinu ekki lokið

Flugvél Landhelgisgæslunnar, TF-SIF, fór í eftirlitsflug í gær þar sem m.a. var aflað upplýsinga um gosstöðvarnar í Grímsvötnum. Á radarmyndum sást gosmökkur sem steig beint upp í loftið og náði um 1,5 km hæð.

Var strókurinn frekar ljósleitur og sást ekki aska í honum. Samkvæmt þessu er greinilegt að gosinu er ekki lokið, segir á vef Gæslunnar.

Fram kemur að næstu daga verði flogið reglulega yfir gosstöðvarnar og fylgst með þróuninni. Radarmyndir og önnur gögn úr eftirlitsbúnaði séu ætíð send vísindamönnum til frekari greiningar.