Sveitarstjórn Grímsnes- og Grafningshrepps hefur samþykkt að hækka lýðheilsu- og tómstundastyrki í sveitarfélaginu í 50 þúsund krónur.
Í Grímsnes- og Grafningshreppi fá foreldrar eða forráðamenn barna á aldrinum 5-18 ára styrk fyrir íþrótta- eða tómstundastarf hvers barns auk þess sem eldri borgarar, 67 ára og eldri, fá styrk til að stunda íþrótta-, tómstunda- eða menningarstarf.
Einnig geta ungmenni í framhaldsskóla nýtt sér styrkinn til kaupa á árskortum í líkamsrækt.
Hækkunin tekur strax gildi og er fyrir allt árið 2020.