Í byrjun september gengu hvorki meira né minna en fimmtíu og tveir nemendur og fjórir kennarar úr Fjölbrautaskóla Suðurlands yfir Fimmvörðuháls, frá Skógum og yfir í Þórsmörk.
Ganga þessi er megin verkefni áfangans ÍÞRÓ2JF02 en þetta var ellefta haustið sem þessi ferð er farin með hóp frá FSu. Hópnum var ekið í rútu snemma morguns að Skógum þar sem gangan hófst og siðan var hann sóttur í Bása í Þórsmörk um kvöldið að lokinni göngu.
Það er skemmst frá því að segja að ferðin gekk í alla staði mjög vel. Nemendurnir stóðu sig frábærlega og kláruðu þessa 25 kílómetra göngu og rúmlega eitt þúsund metra hækkun með stæl, þrátt fyrir stöku eymsli hér og þar í skrokk og sál. Veðrið lék einnig við hvurn sinn fingur, hlýtt, bjart og falleg fjallasýn. Það var því þreyttur en kátur hópur sem skilaði sér heim eftir góðan dag á sunnlenskum fjöllum.