Góðar umræður á fyrsta íbúafundi

Fyrsti rafræni íbúafundur um mögulega sameiningu Ásahrepps, Rangárþings ytra, Rangárþings eystra, Mýrdalshrepps og Skaftárhrepps fór fram í gærkvöldi.

Fundurinn fór vel fram og gekk fólki vel að tengjast inn á fundinn. Á fundinn mættu 27 manns og voru umræður að loknum kynningum góðar og málefnalegar.

Fundarfólk ræddi hvort sveitarfélögin fimm ættu að halda áfram viðræðum og leyfa íbúum að kjósa um sameiningu þeirra, og þau atriði sem ber að varast ef til þess kemur.

Fram kom að Ásahreppur vinnur flest sín verkefni í samstarfi við nágrannasveitarfélög og eru að vissu leyti háð þeim um þjónustu.

Það sem helst brennur á íbúum í Ásahreppi er að standa vörð um skólahald í Laugalandi og gæta að því að íbúar hafi áhrif á ákvarðanatöku í stærra sveitarfélagi. Þá óttast íbúar aukna skattheimtu og gjaldtöku.

Aukinn kraftur í atvinnuþróun og samgöngumálum var meðal helstu tækifæra sem nefnd voru í umræðum.

Elín Elísabet og Rán Flygenring sáu um að myndlýsa því sem kom fram á fundinum og má lesa helstu niðurstöður út úr teikningum þeirra. Þær munu einnig myndlýsa á næstu fjórum íbúafundum.

Rangárþing ytra             20. október kl. 20-22
Rangárþing eystra          21. október kl. 20-22
Mýrdalshreppur              22. október kl. 20-22
Skaftárhreppur               27. október kl. 20-22

Skráning fer fram á svsudurland.is þar sem er hægt að nálgast kynningar frá fundinum og skoða fleiri teikningar.

Fyrri greinBæjarfulltrúar sameinast um gerð fjárhagsáætlunar
Næsta greinLögreglan hraðamælir á Hvolsvelli