Sumar og vetur frusu ekki saman en hvergi á láglendi á Suðurlandi er frost í nótt. Frjósi sumar og vetur saman segir íslensk þjóðtrú það góðs viti og að heyfengur verði góður í sumar.
Einungis í Tindfjöllum var -0,8°C frost en á Hveravöllum var 0,7°C hiti og á Hellisheiði 1,6°C hiti. Á Steinum undir Eyjafjöllum var 6,6°C hiti, í Selvogi var 5,4°C hiti og í Skálholti í Biskupstungum var 5,2°C hiti.
Í bókinni Sögu daganna segir Árni Björnsson að hvarvetna hafi verið fylgst með því hvort frost væri aðfaranótt sumardagsins fyrsta, þ.e. hvort saman frysti sumar og vetur.
Yfirleitt var það talið góðs viti og jafnvel álitið að rjóminn ofan á mjólkurtrogunum yrði jafn þykkur og ísskánin á vatninu þessa nótt. Í því skyni settu menn skál eða skel með vatni út um kvöldið og vitjuðu svo eldsnemma morguns.
Frá því mælingar sunnlenska.is hófust árið 2010 hafa sumar og vetur oftar en ekki frosið saman. Á þessu eru fjórar undantekningar; árin 2014, 2017, 2018 og 2019. Þau ár voru sumardagarnir hlýir og sólríkir ef frá er talið árið 2018, sem var skelfilega kalt rigningarsumar. Ritstjórn sunnlenska.is telur því – þrátt fyrir þjóðtrúna – talsverðar líkur á hlýju og góðu sumri 2020.
Sunnlenska.is óskar lesendum sínum gleðilegs sumars.