„Gleðiefni að málefni barna séu sett í skýran forgang“

F.v. Helga Elísabet Guðlaugsdóttir, umsjónarmaður verkefnisins Fjarðabyggð, Jón G. Valgeirsson sveitarstjóri Hrunamannahrepps, Birna Þórarinsdóttir framkvæmdastjóri UNICEF, Ásmundur Daði Einarsson félags- og barnamálaráðherra, Lilja Einarsdóttir sveitarstjóri Rangárþings eystra, Sara Elísabet Svansdóttir sveitarstjóri Vopnafjarðarhrepps og Ásgerður Halldórsdóttir bæjarstjóri Seltjarnarness.

Hrunamannahreppur og Rangárþing eystra eru meðal þeirra sveitarfélaga sem hafa bæst í hóp verkefnisins Barnvæn sveitarfélög.

Fjórðungur sveitarfélaga á Íslandi vinna nú markvisst að því að innleiða Barnasáttmála Sameinuðu þjóðanna í allt sitt starf með stuðningi UNICEF á Íslandi og félagsmálaráðuneytisins. Þessum áfanga var náð síðastliðinn þriðjudag þegar sveitastjórar fimm sveitarfélaga undirrituðu samstarfssamning við UNICEF á Íslandi og félagsmálaráðuneytið um þátttöku í verkefninu. Auk Hrunamannahrepps og Rangárþings eystra voru það Fjarðabyggð, Seltjarnarnes og Vopnafjarðarhreppur og fyrr á árinu bættist Mosfellsbær einnig í hópinn.  Með undirskriftinni eru sveitarfélögin sem taka þátt í verkefninu því orðin 17 talsins og yfir helmingur barna á Íslandi búa í þeim.

„Ég er mjög ánægður með kraftinn sem sveitarfélög landsins hafa sett í verkefnið og nú er um fjórðungur sveitarfélaga á Íslandi að vinna í því að verða Barnvænt sveitarfélag. Það er mikið gleðiefni að sveitarfélög landsins setji málefni barna og fjölskyldna í svo skýran forgang og ómetanlegt að finna áhugann á verkefninu,“ Ásmundur Einar Daðason félags- og barnamálaráðherra.

Þau sveitarfélög sem taka þátt í verkefninu vinna markvisst að því að gera réttindi barna að veruleika með stuðningi frá UNICEF á Íslandi og félagsmálaráðuneytinu.

Birna Þórarinsdóttir, framkvæmdastjóri UNICEF á Íslandi, segir undirskriftina mikil tímamót og stórt skref í áttina að Barnvænu Íslandi.

„Það er sérstaklega ánægjulegt að sjá fimm ólík sveitarfélög hefja vegferðina í sama skrefi því það undirstrikar að Barnasáttmálinn er algildur og öll sveitarfélög geta orðið barnvæn, “ segir Birna.

Börn vilja að þeim sé treyst
Í undirbúningi fyrir undirskriftina var leitað til barna í hverju sveitarfélagi og þau spurð að því hvað þeim finnst gera sveitarfélög barnvæn. Svörin létu ekki á sér standa en meðal þess sem börnunum datt í hug var aðgengi allra að menntun, vernd gegn ofbeldi, öruggt heimili fyrir öll börn og góð leiksvæði. Mörgum barnanna fannst vanta meira val hvað varðar íþróttir og þá nefndu þau t.d. að lengja mætti útivistartíma og bæta umferðaröryggi. Það sem koma einna skýrast fram er að það skiptir börnin miklu máli að fá tækifæri til þess að láta skoðanir sínar í ljós og hafa áhrif og þau telja mikilvægt að fullorðnir treysti börnum og virði skoðanir þeirra.