„Nei, það er ekkert leyfi fyrir skiltinu, ég kannast allavega ekki við það, þetta hefur hvorki farið fyrir sveitarstjórn né skipulagsnefnd.
Mér finnst það glannaskapur og ósmekklegt að setja svona stórt skilti upp við þjóðveg númer eitt,“ segir Egill Sigurðsson, bóndi á Berustöðum og oddviti Ásahrepps þegar hann var spurður hvort Kjarval hafi fengið leyfi fyrir umræddu skilti.
Skiltið er rétt austan við Þjórsárbrú, mjög nálægt veginum, skammt frá bænum Þjórsártúni. Þá hefur Kjarval sett upp samskonar skilti, sem er á milli Hvolsvallar og Víkur, sem ekkert leyfi er heldur fyrir.
Harmar leyfisleysið
„Við hörmum það að ekki hafi verið búið að sækja um leyfi fyrir skiltunum, ég stóð alltaf í þeirri trú, okkar auglýsingastofa átti að sjá um það en það varð greinilega einhver misskilningur í málinu. Við höfum ákveðið að fjarlægja skiltin og verður það gert á allra næstu dögum en með því teljum við málið leyst,“ sagði Bjarni Jónsson, framkvæmdastjóri Kjarvalsverslana, í samtali við Sunnlenska.