Gjóskufall færist til vesturs

Sprengigos hefur áfram haldist mikið í Eyjafjallajökli og gera vísindamenn ráð fyrir að 200 tonn komi upp úr gígnum á hverri sekúndu.

Gjóskufalls gætti á Norðausturlandi í dag en síðdegis fór útbreiðslan að færast til vesturs. Tilkynningar um öskufall hafa komið frá Hrauneyjum þar sem bílar urðu svartir vegna öskufallsins, Hæli í Gnúpverjahreppi, Laugum í S-Þingeyjasýslu, Felli í Vopnafirði og í Neskaupstað en á þessum stöðum var um lítilsháttar öskufalla að ræða. Auk þess sást þunn slikja á Sandhólatindi og Bjólfi sem eru fjöll norðan Seyðisfjarðar.

Stíf sunnan og suðvestanátt var yfir eldstöðinni. Nær jörðu var austlægari vindur sem blés áður fallinni ösku til vesturs og norðvesturs. Svifryk mældist í Reykjavík um miðjan dag og má rekja það til foks.

Ekkert hefur sést til gosstöðvanna í dag en gosmökkurinn hefur legið stöðugur í um 7 km hæð samkvæmt veðurratsjá.

Á áttunda tug eldinga mældust á eldingamælum bresku veðurstofunnar frá miðnætti og fram á miðjan dag. Hátt í 10 á klukkustund fram að hádegi en heldur færri eftir það.

Þetta kemur fram á daglegu minnisblaði Veðurstofunnar og Jarðvísindastofnunar HÍ.