Rangárþing eystra áformar að setja upp gjaldtökuhlið á bílaplaninu við Seljalandsfoss. Nýtt deiliskipulag fyrir svæðið hefur tafist.
Samkvæmt því verða bílastæði stækkuð og færð lengra frá fossinum svo að svæðið ráði betur við mikinn fjölda ferðamanna, en greint var frá þessu í fréttum Ríkisútvarpsins.
Umferðaröngþveiti myndast þar á hverjum degi þar sem svæðið er búið að sprengja utan af sér. Samkvæmt deiliskipulagstillögunum verður byggð þjónustumiðstöð á svæðinu og gjald tekið fyrir að leggja bílum.
„Já við höfum líka verið að velta því heilmikið fyrir okkur. Kannski einhverskonar hlið líkt og eru á Keflavíkurflugvelli, þegar menn eru að geyma bílana sína þegar þeir fara til útlanda. Við höfum líka verið að velta fyrir okkur möguleikum á að selja inn á salerni og þess háttar. Þannig að við erum að skoða þessi mál,“ sagði Ísólfur Gylfi Pálmason, sveitarstjóri, í samtali við RÚV.