Nýi vegurinn um Hornafjörð var opnaður fyrir umferð í júní en gjaldtaka hefst á morgun. Í tilkynningu frá Vegagerðinni segir að veggjöld standi undir
hluta kostnaðar við framkvæmdina, rekstri og viðhaldi vegarins.
Innheimta veggjaldsins fer fram undir merkjum Spalar ehf. en markmiðið er að gera gjaldtökuna eins einfalda fyrir notendur og mögulegt er. Gjaldtakan verður að fullu sjálfvirk og vegfarendur þurfa ekki að skrá sig eða greiða sérstaklega þegar ekið er um veginn. Myndavélar lesa skráningarnúmer ökutækja og upplýsingar eru sóttar í ökutækjaskrá.
Reikningur fyrir ferðir hvers mánaðar er síðan sendur í heimabanka og á spolur.is verður einnig hægt að greiða fyrir stakar ferðir.
Stakt gjald fyrir ökutæki undir 3,5 tonnum verður 1.500 krónur, 2.100 krónur fyrir millistóra bíla frá 3,5 til 7,5 tonna og 4.500 krónur fyrir bíla yfir 7,5 tonnum. Afsláttarkjör verða fyrir litla og millistóra bíla og þak sett á mánaðarlegar greiðslur. Þannig er ekki greitt meira en 18.750 krónur á mánuði fyrir minnstu bílana og ekki meira en 26.250 krónur fyrir millistóra bíla.
Í tilkynningu Vegagerðarinnar segir að veggjaldið hafi meðal annars verið ákveðið með hliðsjón af þeim ávinningi sem vegfarendur hafa af nýja veginum, svo sem styttri ferðatíma, lægri eldsneytis- og rekstrarkostnaði og betri akstursaðstæðum.