Bæjarráð Ölfuss samþykkti á fundi sínum í dag að frá og með næstu mánaðamótum verði leikskólar sveitarfélagsins gjaldfrjálsir.
Ákvörðunin felur í sér að öllum börnum býðst allt að 36 klukkustunda leikskóladvöl á viku án gjaldtöku, óháð tekjum foreldra. Í tilkynningu frá sveitarfélaginu segir að ákvörðunin sé tekin á grundvelli sterkrar fjárhagsstöðu og jákvæðrar rekstrarþróunar undanfarin ár.
„Sveitarfélagið Ölfus ætlar að vera í fararbroddi í þjónustu við ungt fólk og börn þeirra. Þessi kynslóð stendur í dag frammi fyrir áður óþekktum aðgangshindrunum á húsnæðismarkaði, meiri skuldsetningu og þyngri greiðslubyrði. Verðbólga og vextir eru að hækka sem þyngir stöðu þeirra enn frekar í samanburði við þá sem eru eldri. Þau eru oftar í leiguhúsnæði og með hærri lán miðað við tekjur. Sveitarfélagið Ölfus er vel rekið og hefur burði til að þess að styðja við bakið á þeim,“ segir Elliði Vignisson, bæjarstjóri.
„Við höfum unnið einbeitt að því að draga úr lóðakostnaði, bjóða upp á heimagreiðslur, bæta íþróttaaðstöðu, fjölga leikskólum, hækka tómstundastyrki og fleira. Nú tökum við næsta skref og bjóðum upp á gjaldfrjálsan leikskóla. Hér velferðin sótt á grundvelli verðmætasköpunar og góður rekstrarárangur á að skila sér beint til íbúa í formi lægri gjalda, aukinnar þjónustu og bættra lífsgæða,“ bætir Elliði við.
Samkvæmt útkomuspá fyrir árið 2025 er gert ráð fyrir 1.346 milljóna króna jákvæðri rekstrarniðurstöðu hjá sveitarfélaginu. Íbúar Ölfuss eru nú rúmlega 3.000 og hefur þeim fjölgað 4% til 6,5% ári seinustu ár.