Björgunarfélag Árborgar, sérsveit ríkislögreglustjóra og sérfræðingar Landhelgisgæslunnar munu framkvæma mælingar á lögun og dýpi gjárinnar í Ölfusá fyrir neðan Ölfusárbrú laugardaginn 16. mars næstkomandi.
Búnaður þessara aðila ásamt búnaði í einkaeigu mun þá verða notaður við mælingarnar og standa vonir til þess að með þeim verði ljóst hvort og hvað, ef eitthvað, er hægt að gera til að ná flaki bifreiðar sem lenti í ánni að kvöldi 25. febrúar síðastliðins upp úr ánni.
Í tilkynningu frá lögreglunni segir að ljóst sé að margt þurfi að ganga upp til að góður árangur náist með mælingunum.