Fullt var út úr dyrum í Tryggvaskála á Selfossi síðastliðinn fimmtudag þegar OK hélt Tæknidaginn 2026 fyrir fyrirtæki og stofnanir á Suðurlandi.
Rauði þráðurinn var öryggi. „Tæknin opnar ný tækifæri, en hún gerir líka meiri kröfur um yfirsýn, undirbúning og varnir. Það gildir jafnt um stór fyrirtæki og smá, og jafnt á Suðurlandi sem annars staðar,“ segir Emil Einarsson, framkvæmdastjóri Notendalausna OK.
Hann segir að markmiðið með viðburðinum hafi verið að færa umræðuna um tækni nær atvinnulífinu utan höfuðborgarsvæðisins og ræða það sem skiptir stjórnendur máli. „Þar á meðal aukin áhersla á gervigreind í tölvum, hvernig fundarherbergi og fjarfundir eru að þróast og hvers vegna netið er orðið einn mikilvægasti hlekkurinn í rekstrinum.“

Sérfræðingar OK héldu fjögur stutt erindi um mál sem eru ofarlega á baugi hjá mörgum fyrirtækjum og stofnunum.
Trausti Eiríksson, vörustjóri PC, fjallaði um nýja kynslóð fartölva með gervigreind. Hann fór yfir muninn á staðbundinni gervigreindarvinnslu og skýjalausnum og hvað gott er að hafa í huga við næstu tölvuendurnýjun.
Halldór Áskell Stefánsson, framkvæmdastjóri stafrænnar þjónustu, tók gervigreindina áfram og ræddi Microsoft 365. Hann lagði áherslu á góðan undirbúning áður en gervigreindarlausnir eru teknar í notkun, öryggisáskoranir og reglulegt eftirlit með umhverfinu.

Gunnar Ingi Björnsson, forstöðumaður innviðasölu, spurði hvort netbúnaðurinn sé mikilvægasti búnaðurinn. Ingólfur Andri Ágústsson, sérfræðingur hjá OK, var með honum í hluta erindisins. Þeir sýndu hvernig netið hefur þróast úr því að vera tæknilegur bakgrunnur í að verða grunnur að öruggum og samfelldum rekstri.
Kristinn Helgason, vörustjóri hljóð- og myndlausna, fór yfir möguleikana í hljóði og mynd, allt frá fjarfundum og fundarherbergjum til stærri rýma og sérsniðinna lausna.
Sameiginlegt stef erindanna var að ný tækni opnar ýmsa möguleika en nýtist best þegar grunnurinn er í lagi.

Að dagskrá lokinni tóku við veitingar og spjall þar sem gestir og starfsfólk OK ræddu áfram um efni erindanna og það sem fólk er að fást við í daglegum rekstri.
OK (Opin kerfi hf.) er íslenskt tæknifyrirtæki sem býður fyrirtækjum og stofnunum upp á tæknibúnað, hugbúnað, upplýsingatæknilausnir og þjónustu. OK er með starfsstöðvar í Reykjavík, á Sauðárkróki og á Selfossi, þar sem fyrirtækið er til húsa að Austurvegi 42.


