Hagleikssmiðirnir Karl Helgi Gíslason og Úlfar Sveinbjörnsson tóku að sér að gera upp einstakt skipslíkan úr eigu Sjóminjasafnsins á Eyrarbakka.
Líkanið er af danska skólaskipinu København, sem var smíðað árið 1921 en fórst með 60 manna áhöfn árið 1928 á leið frá Argentínu til Ástralíu. Líkön af þessu stórkostlega seglskipi voru smíðuð í Bretlandi á árunum 1934-1946.
Sjóminjasafnið eignaðist skipslíkanið þegar Kristinn Vigfússon gaf það Sigurði Guðjónssyni, stofnanda safnsins, fyrir mörgum áratugum. Það skemmdist síðan verulega mikið í Suðurlandsskjálftanum árið 2008 og var það því kærkomið að fá Karl Helga og Úlfar í það nákvæmisverk að færa skipið í sýningarhæft ástand.
Líkanið af skólaskipinu København verður á sýningunni Bátar og býli sem opnar í Sjóminjasafninu snemmsumars.