Selfyssingurinn Monika Ewa Lukaszewicz hefur vakið töluverða athygli fyrir einstaklega fallegar kökur. Þær þykja sannkölluð listaverk en ólíkt öðrum listaverkum má borða þessi.
Monika, sem kemur upphaflega frá Póllandi, bjó í Grindavík í fjögur áður en hún flutti ásamt eiginmanni sínum til Selfoss í nóvember 2023. Þau hjónin þurftu eins og svo margir aðrir þurftu að yfirgefa heimilið sitt í snatri vegna eldgosahrinurnar við Sundhnúksgíga.
„Á þeim tíma höfðum við enga hugmynd um hvernig svona stór flutningur myndi hafa áhrif á líf okkar. Þegar við lítum til baka reyndist þetta þó vera ein besta ákvörðun sem við höfum tekið. Með tímanum áttuðum við okkur á því að Selfoss er sannarlega okkar staður á Íslandi,“ segir Monika í samtali við sunnlenska.is.
Selfoss besti staðurinn
„Við elskum hversu fallegt það er hér. Veðrið er miklu betra en í Grindavík, þar sem það var oft vindasamt og rigning jafnvel þegar restin af landinu nýtur sólarinnar. Fyrir tveimur árum fengum við okkur hund, svo við kunnum sérstaklega að meta alla frábæru staðina til að fara í gönguferðir. Við elskum göngustígana meðfram Ölfusá, Hellisskóg og annað lítið skóglendi rétt fyrir utan Selfoss. Þetta eru nokkrir af uppáhaldsstöðunum okkar til að eyða tíma saman.“
„Í fyrra gátum við keypt okkar eigið heimili hér og við vorum líka heppin að finna störf sem við höfum virkilega gaman af. Maðurinn minn vinnur í sundlauginni og ég vinn hjá World Class. Við kunnum virkilega að meta vinnustaði okkar og fólkið sem við vinnum með. Allir tóku vel á móti okkur frá upphafi og það gerði það miklu auðveldara að láta sér líða eins og heima.“
Gat ekki lengur látið mömmu baka
Kökuævintýri Moniku hófst á tímum COVID-faraldursins. „Ég vildi einfaldlega borða eitthvað ljúffengt. Á þeim tíma var ég ekki að ferðast til Póllands og mamma mín hefur alltaf bakað dásamlegar kökur fyrir mig – hún pakkaði meira að segja nokkrum niður fyrir mig til að taka með mér til Íslands. En þar sem ég gat ekki lengur látið hana baka ákvað ég að byrja að baka mínar eigin kökur.“
Monika segir að frá upphafi hafi hún haft mikinn stuðning frá eiginmanni sínum. „Hann elskaði allt sem ég bakaði og hvatning hans gaf mér sjálfstraust til að halda áfram. Skömmu síðar spurðu vinir okkar hvort einhver gæti bakað afmælisköku fyrir dóttur þeirra, sem var að verða tveggja ára. Ég bauðst til að baka kökuna og það var í raun augnablikið þegar allt byrjaði.“
„Síðan þá hef ég heillast af af nútímabakkelsi. Ég vildi læra allt frá fyllingunum inni í kökunni til mismunandi tegunda krema sem notuð eru til að skreyta og skapa fullkomlega slétta áferð. Kökur og hönnun þeirra hefur breyst mikið í gegnum árin og nútíma kökur eru allt öðruvísi en þær kökur sem ég man eftir frá minni barnæsku. Þetta hvatti mig til að halda áfram að læra og gera tilraunir.“
„Ég heillaðist líka af því að búa til nútímalega einstaka eftirrétti, þekktir sem eineftirréttir (e. mono desserts). Það eru eftirréttir sem eru gerðir eru fyrir einn. Þetta eru litlir eftirréttir sem eru gerðir í sílikonmótum, frystir og síðan skreyttir með súkkulaði eða glansandi spegilgljáa. Í dag eru eftirréttir sem eru í laginu eins og mangó, ber eða kókoshnetur sérstaklega vinsælir. Mér finnst þeir ekki bara fallegir að sjá heldur líka ótrúlega ljúffengir.“
Lærir eitthvað nýtt með hverri köku
Monika segir að byrjunin á kökuævintýrinu hafi verið heldur brösugleg. „Margar kökur urðu ekki eins og ég vildi og ég þurfti oft að finna réttu uppskriftirnar með tilraunum og mistökum. Að læra að ná fullkomlega sléttri áferð og skreyta kökur fallega krafðist mikillar þolinmæði og æfingar.“
„Enn í dag finnst mér ég vera að læra. Hver kaka kennir mér eitthvað nýtt, gefur mér nýjan innblástur og hjálpar mér að bæta færni mína. Ég trúi því að í kökuskreytingu sé æfingin mikilvægasti kennarinn. Minn helsti innblástur kemur frá frá Instagram. Ég fylgist með nokkrum af bestu konditorum heims og kökugerðarmönnum. Þeir skapa sannkölluð listaverk og að sjá það hvetur mig til að halda áfram að bæta mig og læra nýjar aðferðir.“
„Í hvert sinn sem ég fæ kökupöntun þá eyði ég alltaf tíma í að hugsa um hönnun kökunnar. Jafnvel þótt viðskiptavinur hafi ákveðið þema eða stíl í huga, þá vil ég skapa eitthvað sem er einstakt. Ég vil ekki herma eftir einhverri köku sem ég hef séð á netinu. Ég nota í staðinn þessar hugmyndir sem innblástur og bæti síðan við minni eigin sköpunargáfu og persónulegu snertingu. Mér finnst að hver kaka ætti að vera einstök og hver hönnun ætti að endurspegla lítinn hluta af þeim sem bjó hana til.“
Með konditorinn í blóðinu
Sem fyrr segir þá kviknaði ástríða Moniku fyrir kökugerð í heimsfaraldrinum en Monika á þó ekki langt að sækja kökugerðarhæfileikana þar sem mamma hennar er konditor að atvinnu og starfaði í því fagi yfir 40 ár.
„Ég hélt aldrei að ég myndi feta í fótspor mömmu. Það voru alltaf heimabakaðar kökur á heimilinu okkar og ég vissi að mamma var sérfræðingurinn. Í mínum augum bakaði hún bestu kökurnar svo það hvarflaði ekki einu sinni að mér að reyna. Hver gæti jú keppt við meistara?“
„Svo breyttist einfaldlega eitthvað. Ég uppgötvaði hversu mikla gleði það gaf mér að baka og skreyta kökur. Það sem byrjaði sem forvitni varð fljótt að sannri ástríðu og í dag get ég ekki ímyndað mér að búa ekki til nýjar kökur og eftirrétti,“ segir Monika er stöðugt að læra og þróa færni sína enn frekar. Framundan er til að mynda kökugerðarnámskeið í Póllandi þar sem hún mun læra af bestu kökugerðarmönnum landsins.
Eflist við hrósin
Kökurnarnar hennar Moniku hafa fengið frábærar viðtökur og er fólk duglegt að hrósa henni fyrir bæði útlit og bragð.
„Kökurnar mínar hafa fengið ótrúlega jákvæð viðbrögð. Fólk hrósar kökunum mínum mikið og hvert einasta hrós hvetur mig til að halda áfram að bæta mig og skapa meira.“
„Það sem skiptir mig mestu máli er þegar einhver sendir mér skilaboð eftir veislu, án þess að ég sé að biðja um endurgjöf, bara til að segja mér hversu ánægð þau voru með kökuna eða hversu góð gestunum fannst kakan. Þessi skilaboð skipta mig sérstaklega miklu máli vegna þess að þau eru alveg sjálfsprottin. Það sýnir að einhver gaf sér tíma til að deila jákvæðri upplifun sinni og það er eitt mesta hrós sem ég get fengið.“
„Að vita að kökurnar mínar gleðja fólk og verða hluti af sérstökum stundum þeirra er það sem hvetur mig mest og hvetur mig til að halda áfram að vaxa sem kökulistamaður.“
Mikilvægt að stíga út fyrir þægindarammann
Aðspurð hvort Monika sé sérstaklega stolt af einhverri köku sem hún hefur búið til segir hún að þær séu nokkrar sem standa upp úr. „En ef ég þyrfti að velja eina köku, þá væri það þriggja hæða brúðarkaka sem ég bakaði fyrir vini sem ég vann með í Bláa Lóninu.“
„Kakan var skreytt með pappírsblómum og gerði ég hvert einasta blóm handgert. Þetta var í fyrsta skipti sem ég bjó til þessa tegund af skreytingum, svo ég var sérstaklega stolt af útkomunni. Þetta var krefjandi verkefni, en að sjá allt smella saman gerði allan tímann og fyrirhöfnina þess virði.“
„Þessi kaka gaf mér mikið sjálfstraust og minnti mig á að það að stíga út fyrir þægindarammann er oft besta leiðin til að vaxa,“ segir Monika en þess má geta að hún bakaði einnig sína eigin brúðkaupstertu, enda þýðir ekkert nema það allra besta fyrir jafn mikilvæg tilefni og brúðkaup.
Allt gert frá grunni
Kökurnar hennar Moniku eru ekki bara fallegar heldur einnig bragðgóðar. „Bragðið skiptir mig jafn miklu máli og útlitið – ef ekki meira. Falleg kaka ætti líka að vera ljúffeng, því hún er ætluð til að deila og njóta, ekki bara til að dást að.“
„Þess vegna legg ég mikla áherslu á gæði hráefnisins. Ég nota aldrei tilbúnar duftblöndur eða skyndikremfyllingar. Allt er gert frá grunni með ferskum rjóma, eggjum, alvöru vanillu og hágæða belgísku súkkulaði. Ég tel að frábært bragð byrji alltaf með góðu hráefni.“
„Ég geri líka ávaxtafylltar kökur úr ferskum ávöxtum, sem og hnetukökur úr 100% hreinu pistasíu- eða heslihnetumauki. Sum þessara úrvals hráefna er auðveldara að finna í Póllandi, svo ég sæki þau þaðan. Mörg þeirra eru framleidd á Ítalíu og eru þekkt fyrir einstök gæði. Fyrir mér eru engar flýtileiðir þegar kemur að bragði. Að nota besta hráefnið er grunnurinn að hverri köku sem ég geri og ég tel að fólk geti sannarlega smakkað muninn.“
Draumurinn að opna kökustúdíó
Monika hefur bakað fjölmargar kökur fyrir hin ýmsu tilefni og henni þykir afar vænt um að vera partur af merkisdögum mannsævinnar hjá fólki.
„Að vita að ein af kökunum mínum verður lítill partur af svona mikilvægum hátíðahöldum er eitt af því sem gefur mér hvað mest við það sem ég geri.“
„Draumurinn er að geta opnað mitt eigið kökustúdíó þar sem ég get útbúið sérhannaðar kökur og falleg eftirréttarhlaðborð fyrir brúðkaup, afmæli og önnur sérstök tilefni. Ég vona innilega að sá draumur rætist einhvern tímann þar sem það gefur mér svo mikið að gleðja fólk með kökunum mínum,“ segir Monika að lokum.
