Lögreglan á Selfossi handtók í gærkvöldi þrjá unga menn er uppgötvaðist að þeir höfðu reynt að selja fjóra gaskúta sem hafði verið stolið.
Gistu þeir fangageymslur í nótt en við yfirheyrslur í dag kom í ljós að þeir höfðu stolið gaskútum víða um land.
Voru mennirnir eltir uppi frá Selfossi og handteknir í Hveragerði. Höfðu þeir reynt að koma gaskútunum í verð hjá bensínstöðvum og sagst vera að skila þeim eftir notkun. Gegn slíkum skilum fást nokkrir þúsundkallar fyrir kútinn.
Við yfirheyrslur játuðu mennirnir, sem eru á aldrinum 18-30 ára, að hafa stolið gaskútum víða um land. Komu fleiri lögregluembætti að rannsókn málsins en mennirnir höfðu m.a. stolið kútum á Hvolsvelli, Selfossi og víðar. Þeir eru allir íslenskir en ekki liggur fyrir hvort þeir hafi komið við sögu lögreglunnar áður. Þeim var sleppt að lokinni yfirheyrslu.
mbl.is greindi frá þessu