Garðyrkjan mikilvægust á Suðurlandi

Íslenskt grænmeti. sunnlenska.is/Guðmundur Karl

Rekstrartekjur garðyrkju á Íslandi voru 6,1 milljarðar króna árið 2017 á meðan þær voru 73,2 milljarðar samtals í öllum landbúnaði á Íslandi.

Tekjur garðyrkjunnar jukust um 800 milljónir króna á tímabilinu 2008-2017, eða um 13% að raungildi en á sama tíma jukust tekjurnar um 13 milljarða króna í öllum landbúnaði.

Þetta kemur fram í nýrri skýrslu sem Vífill Karlsson, ráðgjafi hjá SSV, vann fyrir Samtök sveitarfélaga á Suðurlandi og kynnt var á fundi stjórnar SASS á dögunum.

Sé horft til skiptingar rekstrartekna eftir landshlutum er garðyrkja stærst á Suðurlandi eða um 67% og næst stærst á höfuðborgarsvæðinu og Suðurnesjum ef þeim var slegið saman eða 14%.

Þegar horft var til vægis garðyrkju innan hvers landshluta kom í ljós að hún var mikilvægust á Suðurlandi þar sem hún vóg 1,5% af verðmætasköpun landshlutans og 0,2% á Norðurlandi eystra þar sem hún var næst í röðinni. Atvinnugreinin virðist standa vel og eiga góð tækifæri til vaxtar.

Markmið og viðfangsefni skýrslunnar, sem nefnist Landfræðilegt og efnahagslegt litróf garðyrkju á Íslandi, er að veita yfirlit yfir umfang garðyrkju í einstaka landshlutum á Íslandi en þó með áherslu á hlut Suðurlands. Aukinn innflutningur, áskoranir í umhverfismálum, umræða um orkumál og samningar á starfsskilyrðum ýmissa búgreina voru meðal ástæðna þess að ráðist var í skýrslugerðina.