Garðfuglahelgin, árleg fuglatalning Fuglaverndar, verður um næstu helgi, 25.-28. janúar. Framkvæmd athugunarinnar er einföld og allir geta tekið þátt.
Það eina sem þátttakendur þurfa að gera er að fylgjast með garði í einn klukkutíma einhvern þessara daga.
Þátttakendur skrá hjá sér hvaða fuglar koma í garðinn og þá er miðað við mesta fjölda af hverri tegund á meðan athugunin stendur yfir. Talningin miðar við þá fugla sem eru í garðinum en ekki þá sem fljúga yfir. Ekki má leggja saman. Þetta er til að forðast tvítalningar á sama fuglinum, sem ef til vill kemur á 15 mínútna fresti í garðinn. Þá er hann skráður sem einn fugl ekki fjórir.
Að lokinni athugun skal skrá niðurstöður rafrænt á vef Fuglaverndar.
Gott að gefa daglega til að lokka að fugla
Ef fuglunum er ekki gefið reglulega þá er gott er að hefja undirbúning talningar nokkrum dögum áður með því að gefa daglega til að lokka að fugla. Misjafnt er hvaða fóður hentar hverri fuglategund. Epli eru vinsæl hjá mörgum fuglum og auðvelt að koma þeim fyrir með því að skera þau í tvennt eða stinga kjarnann úr þeim og festa á trjágrein.
Nánari upplýsingar um garðfugla og fóðrun þeirra er hægt að finna á vef Fuglaverndar, í Garðfuglabæklingi félagsins sem kaupa má í vefverslun og fóðurhús og fóður sem selt er til styrktar félaginu.
Nánari upplýsingar er að finna á vef Fuglaverndar þar sem má skrá niðurstöður rafrænt og einnig er hægt að hlaða niður hjálparblaði talningarinnar, sem er með myndum af algengum fuglategundum og er það tilvalið fyrir börn og þá sem eru að stíga fyrstu skrefin í fuglaskoðun.