Bæjarstjórn Hveragerðisbæjar gagnrýnir harðlega hugmyndir Ölfusinga um að skoða eigi orkunýtingu í Reykjadal, eins og lýst er í viðtali við Elliða Vignissonar, bæjarstjóra Ölfuss, í Morgunblaðinu.
„Allar rannsóknir hafa sýnt fram á það að áhrif vegna hugsanlegrar orkunýtingar á svæðinu hefðu veruleg áhrif á Hveragerði sem er næsti þéttbýlisstaður við Reykjadal. Bæjarstjórn telur afar óábyrgt af sveitarstjóra Ölfuss að tala um að skoða eigi orkunýtingu á svæðinu þar sem mikil óvissa ríkir um áhrif á loft, vatnslindir og náttúru og hvetur til að náttúran verði látin njóta vafans,“ segir í bókun sem bæjarstjórn samþykkti á fundi sínum í gær.
„Reykjadalurinn og svæðið í kring hefur síðustu ár verið í friðlýsingarferli sem því miður var stöðvað af sveitarfélaginu Ölfusi fyrir um ári síðan. Bæjarstjórn Hveragerðisbæjar hefur ætíð verið á móti orkunýtingu á svæðinu eða allt frá því að hugmyndir um Bitruvirkjun voru uppi á borðinu,“ segir ennfremur í bókuninni, þar sem einnig kemur fram að allar framkvæmdir á svæðinu myndu draga úr gildi þess sem útivistarsvæðis fyrir þá sem vilja njóta óspilltrar náttúru.
Reykjadalur er á náttúruminjaskrá og er einn vinsælasti áfangastaður ferðamanna á landinu og hafa vinsældir svæðisins aukist stöðugt undanfarin ár.