Gagnrýna endurmat á virkjanakostum

Aðalfundur Náttúruverndarsamtaka Suðurlands gagnrýnir harðlega að Orkustofnun ákveði einhliða að endurmeta virkjanakosti sem þegar hafa verið skilgreindir og metnir í verndarflokk í rammaáætlun.

Þetta kemur fram í ályktun sem samþykkt var á fundinum sem haldinn var í Drangshlíð undir Eyjafjöllum á dögunum.

Aðalfundurinn ályktaði eftirfarandi um virkjanamál og umhverfisvernd á hálendi Íslands og um skipulags- og umhverfismál í ferðaþjónustu:

Samtökin skora á stjórnvöld að veita fjármagni til að hefja vinnu við friðlýsingar svæða sem metin hafa verið í verndarflokk í rammaáætlun.

Samtökin styðja heilshugar baráttu Landverndar, Náttúruverndarsamtaka Íslands og annara frjálsra félagasamtaka fyrir verndun á hálendi Íslands.

Samtökin fagna vaxandi stuðningi sem nýleg skoðanakönnun Gallup sýnir við stofnun þjóðgarðs á miðhálendi Íslands.

Þá lýsti fundurinn áhyggjum sínum af skorti á tilliti til sjónarmiða almennings, almannasamtaka og sérfræðinga við skipulagsgerð, ekki síst við skipulag ferðamannastaða. Aðalfundurinn hvatti til þess að ferðaþjónusta á Suðurlandi verði þróuð og vottuð í samræmi við grunnlögmál sjálfbærrar þróunar, að fram fari faglegt mat á þolmörkum allra helstu ferðamannastaða og að tekin verði upp stýring umferðar og aðgengis í samræmi við niðurstöður þess mats.

Á aðalfundinum var kosin fimm manna aðalstjórn til eins árs. Á stjórnarfundi samtakanna sem haldinn var á Hellu í síðustu viku skipti stjórnin þannig með sér verkum: Ólafía Jakobsdóttir formaður, Vigfús Andrésson varaformaður, Gunnar Ágúst Gunnarsson ritari, Ragnheiður Jónasdóttir gjaldkeri og Úlfur Óskarsson meðstjórnandi. Varamenn í stjórn eru: Aníta Ólöf Jónsdóttir, Guðrún Tryggvadóttir og Kjartan Ágústsson. Skoðunarmenn reikninga eru: Óskar Þór Sigurðsson og Sigurður Sigursveinsson.