Gaf tvívegis upp nafn bróður síns

Héraðsdómur Suðurlands hefur dæmt tæplega þrítugan karlmann á Selfossi til greiðslu 200 þúsund króna sektar fyrir að hafa greint rangt frá nafni og kennitölu þegar hann var stöðvaður við akstur á Selfossi um miðjan ágúst sl.

Maður­inn játaði sök sína fyrir dómi, en hann gaf upp nafn og kenni­tölu bróður síns bæði þegar lögregla hafði afskipti af honum, og svo við skýrslutöku skömmu síðar. Hann gat ekki vísað sínu eigin öku­skír­teini enda búið að svipta hann öku­réttindum til lífstíðar.

Maður­inn á að baki nokkurn brotaferil sem spannar tíu ár, bæði hér á landi og í Brasilíu þar sem hann sat í fangelsi um hríð vegna fíkniefnasmygls.

Dómari taldi ekkert í sakaferli ákærða hafa bein áhrif á ákvörðun refsingar í málinu og refsingin því sekt upp á 200 þúsund krónur eða 14 daga fangelsi.